Le, Ie, Jezu Amchea Somia

Ie, ie, Jezu, amchea Somia,
soddoi amkam patkiank, Dhonia.
Omrut amchea jivachea,
ie, ie, Somia amchea!

Dp.: Denv tôr vegim hea bhúi-tolla,
taronn diuncheak mon'xakullak:
nas zaunk kodinch soddinaka!

Adanv-Even patok kelem,
sorginchem dar Devan dhamplem;
ugtem korunk portun tem
ie, ie, vegim Tum ie!

Patkam-khonddant buddon sonvsar
vorsam zalim sobar hozar.
Amkam, Saiba, soddvonn di;
Tuzo magtanv upkar!

Vichitr, Somia, kaklut Tuji,
asa Tuka vhoddli podvi;
diuncheak amkam bhogsonnem
gheun ie amchem rupnnem.